Eg har ein plan!

Planen er at denne bloggen, som ein gong var ein planleggingsblogg, no skal bli ein mimreblogg for meg - og kanskje samtidig til inspirasjon for deg som er så heldig at du planlegg bryllaup..

Men ha tolmod med meg. Det er mykje på tapetet for tida, med husbygging, ny jobb, born i ny kvardag (skule for eldstemann og ny barnehage for yngsta) og i det heile... Men eg gler meg til eg får tid til å dulle meir med bloggen. Så med ein gong eg har tid nok - for tid har eg jo, berre ikkje alltid nok til å gjere alt eg vil.. Men når eg altså har tid nok, då vert det andre bollar her inne!

Takk

Takk til alle som hjalp oss før, under og etter bryllaupet.

Takk til alle som var med og feira dagen med oss,

og til dei som ikkje kunne vere med,

men hugsa på oss allikevel.

Takk for alle helsingar, blomster og fine gåver.

Takk for gode ord.

Takk til alle som var med og gjorde dagen til eit vakkert minne ♥

Plutseleg!

Det er merkeleg kor tida flyr hastande avgårde før ein får sukk for seg, spesielt i periodar då ein helst skulle ynskje at døgnet hadde fleire timar og vekene fleire dagar. Eller eventuelt at det var mogeleg å klone seg sjølv, slik at den andre kunne ta seg av eksamen og denslags fryktelege tidsslukarar, medan ein sjølv kunne ordne med flytting til den endelege Heimen og vidare planlegging av bryllaup og fest med fine folk som ein er glad i og verkeleg vil bruke tida si på og med.

Mykje er ordna men enda ein del detaljar gjenstår, av slikt som ein må tenkje på når ein planlegg ein av livets største hendingar. Dessverre er det andre viktige ting som må ordnast først. Eksamen til dømes. Siste eksamen før eg er klar for lærarlivet, dersom skulane heime har noko å tilby av arbeid såklart. Men det tenkjer eg ikkje på no. No er det sjølve eksamenen som får (nesten) fullt fokus. Og så er det flytting (i hovudsak Knut sin jobb) og så bryllaup (i hovudsak min jobb). Det er viktig med ei viss fordeling når det skjer så mykje samtidig. Men samarbeid er vi verkeleg ikkje så verst på, om det er lov å skryte litt av duoen ein sjølv utgjer eine halvdelen av. Det meste går seg til nokon lunde slik vi vil. Då er det ikkje skummelt å legge opp til multitasking på høgt nivå i periodar.

Men etter ein månad no, som vi i store delar av veka har budd kvar for oss - eg i Bergen med ungane medan eg førebur meg til eksamen, og han litt her og der (berre ikkje i Bergen) med opplæring i den nye jobben sin med base heime i Florø, så skal det bli godt å få litt ro i kvardagen. Og den første dagen med ro, eller i alle fall berre hygge, det blir 25. juni - sjølvaste bryllaupsdagen. Den dagen kjem vi til å nyte! Den dagen gler vi oss til. Og vi gler oss mest av alt til at så mange som 100 flotte folk - familie, vener og gode naboar skal vere med å feire dagen saman med oss. Vi veit at vi er heldige, og vi er veldig takknemlege for det.

Og til dykk som av ulike grunner ikkje har høve til å vere med denne dagen; Vi håpar det kjem høve til å få dykk som gjestar når heimen vår er ferdig, med gjesterom klare til å huse dykk! Å feire venskap, godt naboskap og elles gode minner kan ein gjere når som helst - ein treng ikkje bryllaup som unnskyldning for denslags! ;)


Store klemmar til alle saman frå  

Visst du vil...

I slike høver som bryllaup er det ofte ein og anna som vil sei eit par ord, eller kanskje bidra med ein sang til dømes. Dersom du er blant dei nemnde "ein eller anna", så er det sjølvsagt veldig kjekt og vi gler oss veldig til å høyre det du vil dele med oss og gjestene våre. Men for ordens skuld vil vi gjerne at du så snart som du har bestemt deg for at du eventuelt vil bidra med noko slikt, så set vi stor pris på om du tek kontakt med vår gode Toastmistress Asta og fortel kva du vil bidra med.

Plan for dagen skal leggast, og ettersom vi er inne i starten på ein travel periode som heretter berre kjem til å ta seg opp for så å halde stressnivået på topp fram til lokala er pynta kvelden før bryllaupet, så er det fint med alt som er meir eller mindre kontroll på så tidleg som råd. Så slepp eg tenke på organisering av bryllaupsmiddagen medan eg avlegg siste eksamen og etterpå skal heim og pakke ned bergenslivet i kasser og køyre det heile til Florø for opp- og utpakking til å bli eit Brandsøy-liv :)

Du kor vi gler oss! Til å komme heim, til bryllaup, til å få tilbringe ein heil dag saman med folk som har betydd mykje, som er ein viktig del av kvardagen no og som forhåpentlegvis kjem til å ha ei rolle i framtida vår også. Berre mange kjekke mennesker (vi blir like oppunder 100 i talet ser det ut til!!!), samla på ein og samme stad - saman med oss på ein av livets viktigaste dager ♥   

Utdrukket

Bruda er utdrukken og framleis i livet, så no er det brudgommen som står for tur før vi er eitt skritt nærare den store bryllaupsdagen. Vi har litt som skal ordnast denne påska, med tanke på bryllaupet, men alt i alt skulle det meste vere i orden. Trur vi.. I alle høve dukkar det vel opp litt meir eller eventuelt noko gløymt etterkvart..

Invitasjonane

No har alle gjestane anten fått invitasjonen, eller dei har den i postkassa eller levert på døre innanfor rimeleg tid, så då freistar eg meg til å legge ut bilde av dei. Det er nemmeleg eit par som har spurt korleis invitasjonane såg ut, når eg sa at mannen og meg hadde laga dei sjølve..

Det er eit A5-ark bretta til A6-format med "dobbeltdører" i front (i mangel på bedre ord). Det vesle panelet med namn og sløyfe(r) på, er festa med dobbeltsidig tapeputer på den venstre av dørene..

Eg er ikkje kjend for å vere ei dame av få ord, i alle fall ikkje blant kjende og kjære, og det er vel det som tel? Uansett var det jo kjende og kjære som skulle lese orda, og då var det naturleg å lage ei heil lita regle ;P Så A6 var ikkje nok boltreplass, og dermed måtte det bli to gonger A6 til å skrive på...

Slik ser altså invitasjonen ut,

så utbretta som den kan bli..

Snart

Det nærmar seg tid for å få fingen ut og lage det som kan lagast til sanghefte og kyrkjeprogram. Kyrkjeprogrammet kan sjølvsagt ikkje gjerast ferdig før vi har hatt samtale med presten, men layouten kan til ei viss grad ordnast før den tid. Sangheftet med alt det skal innehalde kan uansett begynnast på. Får heldigvis printeassistanse, og det er det god hjelp i ettersom det vert nokre hundretals sider til saman med over hundre inviterte middagsgjester!

Eg likar å arbeide med sånt, så dette skal eg (også) kose meg med. Kva er det eigentleg å ikkje kose seg med, når ein planlegg bryllaup??

No er det forresten snart 4 år sidan vi skreiv under på vigselspapira hos sorenskrivar. Det kjendest som ei særs formell forloving, men ettersom vi reint juridisk vart "rette ektefolk" den dagen måtte vi kle oss litt opp. Mintgrøn selskapskjole på kona, og svart dress med matchande slips til kjolen på mannen. Matchande oppdressing er alfa omega syns denne kona her. I utgongspunktet heilt uvesentleg, men samstundes ganske stilig når det først er blitt sånn, syns mannen i huset.

Det ville vore rart å stille opp hos sorenskrivaren i joggedress og utgåtte sko, og det ville vore rart å komme heim etter (den merknadsverdig korte) seansen og ete grandiosa og drikke vatn. Så vi åt ute i lag med foreldre, forlovarar og mormor - som stod for kaffiselskapet etterpå. Ja, så tok vi altså kaffi og plutseleg-bestilt-marsipankake (svigerfar-Atle sin yndlings) etter middagen, i det som no skal verte heimen til oss og ungane :) Gode minner! ...men enda kjekkare vert det å få den verkelege kjensla av å bli og vere gifte, og ikkje minst med minnene frå den store dagen vår saman med alle som er nære og kjære :)

Ei bryllaupskake - takka vere dua som sit på to gullfarga plastikkringar..

Men fram til den dagen, så skal eg altså nyyyte planlegginga medan eg dagdrøymer om dagen med stor D! For det er DEN dagen vi giftar oss. Heilt eigentleg. No er vi berre frykteleg formelt forlova - i eigne auger, om enn "staten" gjerne vil hevde noko anna..